Адыгэ Республикэм 82.2 миллиард рубль (903 милион долар) хъурэ инвестициехэр зыпэIухьащт проект 34-мэ непэ Iоф адашIэ. Анахь шъхьаIэу щытхэр зыгъэпсэфыпIэу «Лэгъонакъэрэ» Тэхъутэмыкъое районым щагъэпсыщт промышленнэ паркымрэ япроектхэр ары,- джащ фэдэу Адыгэ Республикэм илIышъхьэ ипресс къулыкъу къеты.
Республикэ инвестицие шапхъэхэр гъэхъагъэ хэлъэу зэрагъэфедэхэрэм ишIуагъэкIэ инвестициехэр нахьыбэу Адыгеим къыхалъхьэхэ хъугъэ. Джащ фэдэу инвестицие проектхэм ягъэцэкIэнкIэ ищыкIэгъэ инфраструктурэр Адыгеим щагъэпсы, хэбзэIахьхэмкIэ фэгъэкIотэныгъэхэр инвесторхэм афашIых.
«ШIэныгъэу тиIэр къызфэдгъэфедэзэ, Президентэу Владимир Путиным къыгъэнэфэгъэ пшъэрылъхэр дгъэцакIэхэзэ, республикэм нахьыбэу инвестициехэр къыхалъхьаным ыуж титыщт. Инвестицие проект пэпчъ зы чIыпIэм щагъэхьазыры, ахэмкIэ зэрэзэдырагъэштэн фэе пIалъэхэр амал зэриIэкIэ агъэкIэкIыгъэх, фэгъэкIотэныгъэ заули ахэм яI. ИщыкIэгъэ инфраструктурэр тэгъэпсы. А пстэури экономикэм зыкъегъэIэтыгъэным, республикэм хэхъоныгъэ егъэшIыгъэным афэIорышIэщт. IофшIэпIэ чIыпIакIэхэр зэхэщагъэ хъущтых, цIыфхэм яхахъо зыкъиIэтыщт, социальнэ пшъэрылъхэм язэшIохынкIэ бюджетхэм хэбзэIахьэу къарыхьэрэм къыхэхъощт», — къыIуагъ КъумпIыл Мурат.
Comments
Post a Comment